નવી દિલ્લી: 18મી લોકસભાના પ્રથમ સત્રનો બીજો દિવસ છે. હૈદરાબાદના સાંસદ અસદુદ્દીન ઓવૈસીએ શપથ બાદ જય પેલેસ્ટાઈનના નારા લગાવ્યા હતા. લોકસભા સ્પીકરને લઈને સરકાર અને વિપક્ષ વચ્ચે ઘર્ષણ વધી ગયું છે. એનડીએના ઉમેદવાર ઓમ બિરલા સામે ઈન્ડિયા બ્લોકે પણ પોતાનો ઉમેદવાર ઉતાર્યો છે. સ્પીકર પદ માટે 26 જૂને સવારે 11 વાગ્યે મતદાન થશે. એનડીએ નેતાઓએ સંસદ ભવનમાં લોકસભા અધ્યક્ષ પદ માટે ઓમ બિરલાની તરફેણમાં 10 સેટમાં નામાંકન ભર્યું હતું. આ દરમિયાન બીજેપી અધ્યક્ષ જેપી નડ્ડા, ગૃહમંત્રી અમિત શાહ અને અન્ય NDA નેતાઓ હાજર રહ્યા હતા. દરમિયાન વિપક્ષ તરફથી કોંગ્રેસના સાંસદ કે. સુરેશે બિરલા સામે 3 સેટમાં લોકસભા સ્પીકર પદ માટે નોમિનેશન ભર્યું હતું.

નોમિનેશન પહેલા રાહુલ ગાંધીએ કહ્યું- કોંગ્રેસ અધ્યક્ષને સ્પીકરના સમર્થન માટે રાજનાથ સિંહનો ફોન આવ્યો હતો. વિપક્ષે સ્પષ્ટ કહ્યું છે કે અમે સ્પીકરનું સમર્થન કરીશું, પરંતુ વિપક્ષને ડેપ્યુટી સ્પીકરનું પદ મળવું જોઈએ. રાજનાથ સિંહે ફરી ફોન કરવાનું કહ્યું હતું, જો કે હજુ સુધી ફોન આવ્યો નથી.

રાજનાથ સિંહે સંસદની બહાર મીડિયાને કહ્યું કે, મેં કોંગ્રેસ અધ્યક્ષ મલ્લિકાર્જુન ખડગેને સ્પીકર પદ માટે સમર્થન આપવા માટે ત્રણ વખત ફોન પર વાત કરી છે. કોંગ્રેસના સાંસદ કેસી વેણુગોપાલ અને ડીએમકેના ટીઆર બાલુ રાજનાથને મળ્યા હતા, પરંતુ ડેપ્યુટી સ્પીકર પર કોઈ જવાબ ન મળતા તેઓ તેમના કાર્યાલયથી પાછા ફર્યા હતા. સિંહ ઉપરાંત અમિત શાહ અને જેપી નડ્ડાએ પણ વિપક્ષને મનાવવાનો પ્રયાસ કર્યો, પરંતુ કોઈ ફાયદો થયો નહીં. કેન્દ્રીય મંત્રી પીયૂષ ગોયલ અને લાલન સિંહે કોંગ્રેસ પર શરતો મૂકવાનો આરોપ લગાવ્યો. તેમણે કહ્યું કે સરકાર ઉપસભાપતિની ચૂંટણી સમયે વિપક્ષની માંગણીઓ પર ચર્ચા કરવા તૈયાર છે.