કોલકાતા: બંગાળની ખાડીમાં સર્જાયેલ ચક્રવાત રેમાલ વાવાઝોડામાં ફેરવાઈ ગયું છે. IMDના વૈજ્ઞાનિક સોમનાથ દત્તાના જણાવ્યા અનુસાર છેલ્લા 6 કલાકમાં રેમલ બંગાળની ખાડીમાં 13 કિમી પ્રતિ કલાકની ઝડપે ઉત્તર તરફ આગળ વધી રહ્યું છે. બાંગ્લાદેશ અને તેની નજીકના પશ્ચિમ બંગાળના દરિયાકાંઠાના વિસ્તારોમાં તેના લેન્ડફોલની પ્રક્રિયા શરૂ થઈ ગઈ છે. જે આગામી 4 કલાક સુધી ચાલુ રહેશે. રવિવારે રાત્રે 12 વાગ્યા પછી તે બાંગ્લાદેશના સાગર દ્વીપ અને પશ્ચિમ બંગાળના ખેપડા વચ્ચે લેન્ડફોલ થયું. આ દરમિયાન લગભગ 135 કિમી પ્રતિ કલાકની ઝડપે પવન ફૂંકાયો. લેન્ડફોલ સમયે બંગાળની ખાડીમાં 1.5 મીટર ઊંચા મોજા ઉછળ્યા હતા. બંગાળ અને બાંગ્લાદેશના નીચાણવાળા વિસ્તારોમાં પાણી ભરાઈ ગયા છે. માછીમારોને દરિયો ન ખેડવાની સૂચના આપવામાં આવી છે.

ગૃહ મંત્રાલયે NDRFની 14 ટીમ તૈનાત કરી છે અને 5 વધારાની ટીમને સ્ટેન્ડબાય પર રાખી છે. જહાજો અને વિમાનોની સાથે આર્મી, નેવી અને કોસ્ટ ગાર્ડની ટીમો પણ ઈમરજન્સી માટે તૈયાર છે. તોફાનના કારણે કોલકાતાના નેતાજી સુભાષ ચંદ્ર બોઝ એરપોર્ટને રવિવારે બપોરે 12 વાગ્યાથી સોમવારે રાત્રે 9 વાગ્યા સુધી બંધ કરી દેવામાં આવ્યું છે. જેના કારણે 394 ફ્લાઈટ્સ રદ કરવામાં આવી છે. બંગાળના મુખ્યમંત્રી મમતા બેનર્જીએ X પર ટ્વિટ કરીને કહ્યું કે ઘરમાં રહો અને સુરક્ષિત રહો. અમે હંમેશની જેમ તમારી સાથે છીએ. આ તોફાન પણ પસાર થશે.